三十歲唔結婚，就會死（下）
上集：https://bit.ly/34dwbEd
我照常返工，所有同事都默認我已經結咗婚，冇人問任何嘢。
畢竟，好多人結婚都係逼於無奈，一啲都唔興奮，所以依加已經唔流行搞婚禮，大家都係靜靜地註冊就算。
放工前，我向上司遞咗辭職信。
「辭職？」上司瞪大雙眼，我諗佢十年來，都冇收過辭職信。
我面不改容咁講：「係啊，我向職工局申請轉工，個申請通過咗。」
理論上，大家係可以轉工嘅，但要向職工局提出申請，而職工局為咗保持社會穩定，又好少通過申請。
「祝你前程似錦。」上司完全冇懷疑我講大話，假如職工局冇通過申請，而我又自行辭職，咁我應該俾晶片殺死咗。
我按捺住興奮嘅心情，去出版社應徵做作家。
我講番同一個大話，話職工局已經批准我轉做作家。
其實，HR只要打個電話問吓，就會知我講大話。
但所有人都以為，未被晶片殺死嘅人，就係遵守社會規則嘅人。
於是，我順利成為我夢寐以求嘅作家，可以公開發表我嘅作品。
我拎起支筆，寫咗一個故仔，文思如泉湧，將我諗到嘅所有嘢都寫晒出嚟。
然後個故仔就出版啦，做官方作家就係好，無論個故仔寫成點，只要內容冇破壞社會和諧，就可以出版入書局。
無論本書賣成點，都唔會俾人炒，因為政府唔鼓勵轉工。
我嘅小說出版後，我即刻去書局，買晒所有新出版嘅書。
我以為，我對創作咁有熱誠，我嘅思想又冇被晶片限制住，我一定會寫得比所有人好。
點知，我睇晒所有作品，居然發現，我寫嘅嘢同大家都差唔多，題材差唔多、感覺差唔多。
而且，其他人都有相同嘅睇法，但佢哋覺得：「作家寫嘅嘢就係咁㗎啦。」「個個寫嘅書都差唔多。」
我唔係咁諗！我千辛萬苦，再加埋百年難得一遇嘅「壞晶片運氣」，先做到作家。
我有熱誠，同嗰啲只係作文成績好，被分配做作家，為咗出糧而寫嘢嘅人，完全唔同！
我同自己講，只係因為我咁多年都冇寫嘢，一時間冇咩靈感。
之後嗰段時間，我就好似一舊海棉咁，猛咁睇新戲同新書，觀察身邊嘅事同人，想吸收新嘅靈感。
無論我點努力都好，我寫出嚟嘅嘢，都係差唔多，同所有作家差唔多。
我不斷回想，呢排我到底睇過啲咩，點解我寫唔到有意思嘅嘢。
我赫然發現，我根本冇睇過咩令我眼前一亮嘅嘢，因為所有人都被晶片限制住。
而我，雖然偷偷擺脫咗晶片嘅限制，但當所有作品、所有人嘅生活都係千篇一律，我都吸收唔到新嘅靈感，寫唔到新嘢。
愈努力，愈失望。
最後，我做咗作家，但只係做咗其中一個「為咗出糧而不斷寫文」嘅作家。
我甚至覺得，生活，同以前做文員冇咩分別。
每個人嘅思想看似獨立，但其實係不斷受到外界影響。
如果成個世界都唔自由，無論你嘅思想有幾自由，都飛唔出個框框。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #三十歲唔結婚就會死
Search